Oahppit galget, váhnemiid dahje ovddasteddjiid čálalaš dieđu vuođul, beassat dain osiin oahpahusas maid váhnemat/ovddasteaddjit dahje oahppi ieš iežas osku dahje eallinoainnu geažil vásiha ahte livččii dakkár oskkumeanuin mielde mat gullet eará oskkoldagaide, dahje guorraseame eará eallinoidnui, dahjege mange láhkái atná/atnet unohassan dahje loavkideapmin. Skuvla galgá heivehit eará oahpahusa oahppoplána vuođul dán oahppái. Dat mearkkaša ahte oahppi oažžu seamma oahpu go eará oahppit, muhto iežá ládje. Oahppit badjel 15 jagi sáddejit ieža ohcama. Beassanriekti guoská buot skuvlafágaide. Skuvla galgá juohke jagi dieđihit ohppiide ja váhnemiidda/ ovddasteddjiide dán vuoigatvuođa birra ja oahppoplána sisdoalu birra.
Kristtalašvuohta, osku, eallinoaidnu ja etihkka lea dábálaš skuvlafága mii dábálaččat galgá čohkket ohppiid. Fága oahpahus ii galgga leat sárdnideapmi. Skuvla galgá atnit árvvus ohppiid ja váhnemiid/ ovddasteddjiid oskku ja filosofalaš jáhku, ja sihkarastit ovttadássásaš oahpahusa. Goitge sáhttet čuožžilit dakkár dilálašvuođat mat leat váddásat ohppiid dahje váhnemiid/ovddasteddjiid mielas.